Светскиот економски форум (СЕФ) објасни зошто кафето станува поскапо и колку долго може да потрае ваквата ситуација.

Цените на големо на кафето Арабика годинава се удвоија. Оваа сорта на кафе сочинува 60 отсто од вкупниот светски пазар на кафе. Поскапено е и помалку квалитетното кафе Робуста, сорта која се користи во производството на инстант кафе. Неговата цена е највисока во последните 10 години.

Постојат неколку причини зошто кафето поскапе. За време на пандемијата на коронавирус, имаше недостиг на контејнери за транспорт. Ова ја забави трговијата со кафе.

Во Бразил, кој е најголемиот светски производител на кафе Арабика, имаше појава на мразови и суши на полињата каде што се одгледува кафе. На Етиопија, која исто така е голем производител на Арабика, ѝ се заканува граѓанска војна. Во Виетнам, кој е лидер во одгледувањето на кафе Робуста, се зголемува бројот на заразени со коронавирус, што се одразува и на производството.

Зголемувањето на големопродажната цена на кафето не значи дека веднаш ќе се зголеми во малопродажбата. Сепак, производителите на кафе се соочуваат со слични проблеми како и производителите на храна.

Покрај тоа, поскапи се суровините и енергијата потребни за производство. Експертите очекуваат дека растот на цените на кафето ќе продолжи најдоцна до 2023 година.