blank

Рускиот дисконтен синџир маркети „Мере“, или како што на Запад го нарекуваат „рускиот Лидл“ отвори фирма во Македонија и бара вработени за повеќе градови низ цела држава.

Како што објави деновиве „Инстор“, специјализиран месечен магазин за трговија со стока за широка потрошувачка, „Мере“ влегува преку фирмата „Русторг ДОО“ – Прилеп, основана на 16.06.2021. Повикувајќи се податоците од Цeнтрален регистар, „Инстор“ пишува дека како претежна дејност е наведена „трговија на мало во неспецијализирани продавници, претежно со храна, пијалаци и тутун“. Фирмата е основана е со влог од 200.000 евра, а како сопственици се Валериј Генадијевиќ Јаковлев, Евгениј Генадијевич Пшеницин, Сергеј Иванович Шнајдер и Андреј Иванович Шнајдер, сите со адреса во сибирскиот град Краснојарск. Управител е Евгениј Петрович Боклач.

Компанијата веќе објави огласи за вработување во кои бара менаџери за развој во Скопје, Куманово, Охрид, Струга, Струмица, Гостивар, Тетово, Велес, Штип, Кочани, Прилеп, Битола и Кавадарци, менаџер за набавки, систем администратор…

Инаку, овој руски синџир супермаркети во британските медиуми го опишуваат како „руски Лидл“ поради тоа бил поевтин дури за 30 проценти од најповолните маркети во Велика Британија, како што се „Алди“ и „Лидл“. Имал 3.200 продавници ширум светот.

Како што пред два дена пишува британски Мирор, „руската верзија на Лидл“ конечно започна со испорака на производи пред најавеното отворање на првата продавница во Престон ова лето. Освен во Престон, планирани се уште три продажни места на „Мере“ оваа година – две во Велс, и едно во Кастфорд на северот на Англија, а најавата е дека сака да отвори 300 маркети во Велика Британија во следните осум до десет години, иако за сега ниту една друга локација не е потврдена.

blank

„Мере“ во Русија тргува како „Светофор“, а првата европска продавница ја отвори во 2018 година, пишува Мирор.

Во нашиот регион присутен е и во Србија од декември лани, и таму планира да отвори вкупно 100 продавници.

Очигледно, домашните синџири на дисконтни продавници добиваат голема конкуренција. Пред „Мере“, своето присуство официјално го најави и германски „Лидл“, со отворање на маркети во осум града, како и изградба на голем логистички центар преку кој што ќе оди нивното снабдување, што е вообичаена практика во сите земји каде што е присутен овој познат малопродажен бренд. Вредноста на целата инвестицијата е 300 милиони евра.