blank

Инспекторите на ДПИ тргнаа во контрола на маркетите за да видат дали трговците се придржуваат за одлуката на Владата и дали ги „замрзнале„ цените. Се проверуваат сите маркети низ државата, а казните за непочитување на одлуката се високи и достигнуваат и до 10.000 евра. Директорката на  ДПИ, Анета Симеска-Димоска, вели дека  во моментов два трговски субјекти се уште не доставиле евиденција за цените на производите и против нив се поднесени прекршочни пријави, ако деновиве не ја достават потребната документација ќе бидат казнети

Инспекторите на Државниот пазарен инспекторат се на терен и проверуваат дали во маркетите се почитува одлуката на Владата за замрзнување на цените на лебот, шеќерот, брашното тип 400, сончогледово масло за јадење, трајното млеко, свежото месо и сувомесни производи, сирењето и урдата. Овие производи треба да ги имаат цените од 1 декември, кои не смеат да бидат променети до крајот на јануари следната година. Од Инспекторатот велат дека се проверуваат сите маркети низ државата, а казните за непочитување на одлуката се високи и достигнуваат и до 10.000 евра.

-Одлуката за замрзнување на цените на одделни производи стапи на сила на 6 декември, а од 7 декември инспекторите излегоа на терен да проверат дали трговците ја почитуваат истата. Се проверуваат цените кои во моментот се објавени на полиците во маркетите, односно продажните цени. Освен во трговијата на мало замрзнати се цените и во трговијата на големо, што значи дека и тие не можат да ги менуваат цените додека трае одлуката, вели за ВЕЧЕР, Анета Симеска-Димоска, директорката на ДПИ.

Контролите се вршат во сите трговски објекти и во сите градови во државата, се разбира сите трговци не можат да бидат опфатени во еден ден, бидејќи контролите ќе се вршат според однапред определен план.

-Немаме доволно инспектори со оглед на тоа што во моментот имаме премногу обврски. Освен цените во маркетите инспекторите проверуваат и дали лицата поседуваат сертификати на маста каде се задолжителни, вршат контроли за кесите и постапуваат по други претставки од граѓани. Инспекторите ќе работат и за време на празници и викенди се со цел со овој капацитет со кој располагаме да бидат опфатени сите трговци, вели таа.

Таа додава дека ќе се постапува и од пријави од граѓани кој доколку сметаат дека одредени цени не се на нивото на кое што биле на 1 декември треба да пријават на телефонскиот број 191 или на веб-страницата на ДПИ.

Во моментов се споредуваат цените кои се во евиденцијата на маркетите со оние кои важеле на 1 декември.

-Во моментов два трговски субјекти се уште не доставиле евиденција за цените на производите и против нив се поднесени прекршочни пријави, ако деновиве не ја достават потребната документација ќе следат казни, вели директорката на ДПИ.

Трговците кои нема да ја почитуваат одлуката за замрзнување на цените, казните ќе се движат од 800 евра до 1.000 евра за микро-трговец, од 1.600 до 2.000 евра за мал трговец, од 3.000 до 6. 000 евра за среден и од 7.000 до 10.000 евра за голем трговец. За одговорното лице во маркетото казната ќе биде од 50 до 500 евра во денарска противвредност во зависност од типот на објектот, а за трговец поединец од 150 до 250 евра.