Хрватскиот професор по економија, поранешен декан и пратеник Иван Ловриновиќ на фејсбук објавил, како што тврди, писмо од еден угостител.
Во писмото се наведува и предлог работното време на маркетите да се ограничи до максимално 18 часа и во недела да не работат, бидејќи нивното работно време комплетно го уништува угостителството.
Потоа се наведува и илустративен пример:
„Едно печено пиле чини 4 евра, две пива 2,13 евра, домат 0,67 евра, четвртина леб 0,27 евра, што вкупно изнесува 7,06 евра. Државата од тоа по пат на ДДВ добива околу 1,73 евра. Истиот гостин да консумирал во ресторан би платил 33,31 евро, а износот на ДДВ би биле поголем од целосната смета во хипермаркет. Значи, хипермаркетите ги уништуваат угостителите и државниот буџет. Мој предлог е да се ограничи работното време на маркетите до максимални 18 часа и да не работат во недела. Што ви би предложиле“, пишува во писмото кое го споделил, по што напишал и одговор.
„Мој одговор: Би го предложил она што Вие го предложивте, бидејќи туристичките земји тоа одамна го регулирале на начин да секој може да работи, а не маркетите да ги уништуваат угостителите и на тој начин да ги намалуваат приходите во буџетот. Освен тоа, постоечката состојба поттикнува евтин туризам и го зголемува загадувањето на околината кое е се поголем трошок, за кој никој не зборува. Страшно е колку хипермаркетите го поттикнуваат увозот и така низ нашиот туризам се продава доминантно странска роба“, тврди економистот Ловриновиќ.
На сето тоа, додава, Хрватската народна банка со преценетиот курс на куната задава уште еден додатен удар бидејќи ја руши конкурентноста и ги намалува приходите на сите кои живеат од тоа. Од постоечкиот модел на туризам, истакнува, сите имаат повеќе корист од тие самите во Хрватска.
„Странските трговски прехранбени ланци во изминатите 15 години не уплатиле во државниот буџет ниту една куна данок на добивка, бидејќи постојано искажуваат загуба“, напишал професорот од Економскиот факултет во Загреб, пренесува Индекс.
