Бизнисот очекува раст на цените на некои основни прехранбени производи од 40 до 50 проценти и го повика вицепрмеиерот за економски прашања Фатмир Битиќи на итна средба.

Од Стопанската комора бараат итна средба за да може навремено да се ублажи ценовниот шок кој се очекува да ги погоди граѓаните до крајот на годината. Во моментов продуктите веќе се поскапени од 5 до 10 отсто.

Растот на цените може да се ограничи на само 15 проценти, сметаат од комората, но само доколку Владата излезе во пресрет. Како причина за раст на цените се наведуваат климатските промени, намаленото земјоделско производство, недоволна работна сила, скапиот транспорт и скапите енергенси.

За сувомесните производи цените се очекува да се зголемат за 20 до 40 проценти, но зголемување на цената ќе има и кај лебот. На фармерите основните производни трошоци, велат од таму, им се зголемени за 70 до 80 проценти, поскапени се и фолиите, енергенсите.Во млечната индустрија за 10 – 11 отсто се зголемени директните трошоци.

Драстично поскапеле житарките и маслодајните семиња. Нивните цени во моментов се повисоки за 20 до 100 проценти отколку пред една година. Со оглед дека житарките и маслата се составен дел на многу прехранбени производи, се стравува дека скокот на нивните цени ќе предизвика бројни поскапувања на храната во продавниците, што би го загрозило животниот стандард на граѓаните.

-Во Албанија Владата ги субвенционираше извозниците на земјоделски производи и денес домашниот пазар е преплавен со земјдоелски производи од соседството, а во Србија, како резултат на лош род и намалени приноси, се забрани извоз на голем дел од суровините, посочи Васко Ристовски од Комората.

Претседателот на Групацијата за месо и месни преработки, Гоце Трајчев, вели дека поскапувањето на месните преработки се очекува да биде 15 отсто колку што е на глобалните пазари, но може да е и повеќе ако државата продолжи да ја игнорира поддршката.

Сојата минатата година се купуваше за 340 – 380 евра за тон, а на почетокот на годината скокна до 500 евра. Поскапени се и пченицата, јачменот и пченката. Брашното поскапе 20 проценти за 12 месеци,додаваат од комората.