Конечно пронајдов место кое не е далеку од Охрид, уствари е на помалку од 50 км, и се наоѓа помеѓу Охрид и Скопје, пред Кичево на магистралниот пат од лева страна и, бидејќи не е многу далеку, можат пред летнава сезона нашиве охридски, а и скопски и други ресторани да доаѓаат на пракса.

Се работи за ресторан АТВА кој се наоѓа на самиот пат во општина Другово, пред Кичево.

Да не звучит ко клише, ама ова првпат го пишувам и стварно го мислам: Ова е број 1 ресторан во Македонија.

Да елаборирам зошто ова го мислам:

Прво и основно : Влез – добар, простран, да се паркираш ко чоек.

Беспрекорно уредени зелени површини, базени, играчки за деца, лево жуборкат река ( не знам која река е ова ), пријатна свежина и супер атмосфера.

Влегуваш, хигиена беспрекорна. Тоалетите – беспрекорни, се мириса на „ливанто“ и се гледа дека се имплементирани највисоки американски стандарди. По мој вкус, топ! Не сум јас некој фан на етно-ќумези, незабришени јазбини каде хигиената е шести или седми приоритет. Со овој детал, ме фасцинираа….

Одиме наредно, храна. Едноставно во овој ресторант што и да нарачаш не можеш да згрешиш. Точка… Немат овде трте-мрте, ова е добро, ова не чинит. Ресторанов ломит.

Одиме со ред: Мавам 2-3 ракии ( ракија по цена од 5-60 денари ладна грч ). Нарачувам салата – една шопска да ги испоштовам моите опинчарски корени – големина од 2 до 3 шопски во Скопје или Охрид. Состојките се свежи и ладни, сирење – од поквалитетното – не некоја cheapass фета растителна. Од фора, ама обавезно нарачувам Chicken Caeser салата или по нашки Цезар салата – и ја препорачувам ( 150 денари – количина за две во други ресторани, мастраф полно, имаат некој убитачен сос – не можам да престанам да боцкам ).

Главно јадење – не можеш да погрешиш. Последно сум заглавен со пастрмајлија свинска ( 180 денари – совршен микс на зачинето свинско месо и кашкавал и тогаш месено тесто – меко ала бебешка гуза ). Закон ! Свинско ребро со автентичен американски BBQ сос околу 250 денари – кичма прекршај!!!

Имаат и разни специјалитети, во тенџерчиња пилешко со пармезан – нешто невиѓено за наши услови. Имаат и премиум мени, октоподи по жарој, ракчиња во сосој, триста тракатанци – не сум пробал од ова, ама од досегашното – вервам дека е врв. Има исто едни лепчиња – се тазе печено тогаш, со кајмак и некое сувомеснато – јаооо.

Пици, неколку пати сум пробал, опасна зделка. Од 220-300 денари – пица по највисоки стандарди како во количина, така и во балансираност на состојките. Нема грешка…

Сакам и мелено – имат bigass плескавици обвиткани во тесто и така испечени. Со некој добро зачинет компир одат. Ломови…

После се ладам со 2-3 пива, грч ладни, по 70 денари се мислам… Фул сервис…

Сакаш да си одиш, не можиш… те фаќат дремка а требит да возиш… Бегам со тешко срце и се мислам кога пак да се подвратам.

Сметката, за двајца – со сите салтанати по процедура – „смешни“ 1.200 – 1.300 денари. За овие пари во 99% ресторани нема да добиете третина од оваа храна. Количински… За квалитет не сакам да разговарам.

Затоа, по мое мислење – сега за сега – број 1 во Македонија е овој ресторан… Нихт обџекшнс… Ви препорачувам да го посетите, нема да зажалите…

ПС. Не е ова никаква реклама, ова е ривју од И Гладен И Жеден за Ценометар.мк